كوت بو ستة أونلاين — لعبة الورق الكويتية

أول ما تفتح اللعبة تختار: "ضد الكمبيوتر" (أنت و٥ لاعبين كمبيوتر، تبدأ فوراً) أو "أونلاين" مع لاعبين حقيقيين.

في الأونلاين تبدأ اللعبة لما يدخل الرابط ٦ لاعبين. قبلها تشوف "جاري الانتظار" وكم لاعب ناقص. المقاعد تتوزع بالتناوب: الفريق الأول (١ ٣ ٥) والثاني (٢ ٤ ٦).

الورق ٥٤ ورقة: ٥٢ ورقة عادية مع الجوكر والميكر، وكل لاعب يستلم ٩ أوراق.

أسماء الحكم: القلب "حاس"، النجمة "ديمن"، البستوني "سبيت"، والسباتي "كلفس".

الجوكر ياكل كل شي. الميكر ياكل كل شي ماعدا خال الحكم. الخال هو الـ A (الأس) من نوع الحكم، وهو ياكل الميكر وكل الحكم، ويخسر قدام الجوكر فقط.

كل دور من ٦ أوراق اسمه "أكلة". اللي ياكل الأكلة يضغط زر "شيل الأكلة" (قدامه عداد ٥ ثواني) عشان تبدأ الأكلة اللي بعدها.

إذا الطلب باون: الجوكر والميكر يُعتبرون من الحكم، فإذا الأكلة بدأت بحكم لازم تلعب حكم أو جوكر أو ميكر.

إذا الطلب مو باون: الجوكر والميكر تقدر تلعبهم في أي وقت. وأول لاعب يبدأ الأكلة بجوكر أو ميكر يحترق ورقه وما له قيمة، واللاعب اللي بعده هو اللي يحدد الزات المطلوب.

الطلب: كل لاعب مرة وحدة، إما يطلب ٥ أو ٦ أو ٧ أو ٨ أو ٩ "باون"، أو يقول "طاف". إذا الكل قال طاف، آخر واحد (الموزّع) لازم يطلب ٥ على الأقل.

ملزوم: إذا الكل قال طاف، آخر لاعب عنده خيار إضافي اسمه "ملزوم". هو مثل طلب ٥، بس لازم يختار حكم عنده منه ٣ أوراق أو أقل. وإذا خسر الملزوم، الخصم ياخذ ٥ نقاط فقط (مو ١٠).

الوقت: كل لاعب عنده ٥ ثواني كحد أقصى عشان يلعب ورقته. إذا خلص الوقت تنلعب ورقة عنه تلقائياً.

اللي يفوز بالطلب يختار الحكم ويبدأ أول أكلة. لازم تلعب من نفس نوع الورقة الأولى إذا عندك، وإذا ما عندك العب أي ورقة.

الخسارة التلقائية: لو طلبت ٧ وجاب الخصم ٣ أكلات، ما عاد تقدر توصل ٧، فتنتهي الجولة فوراً وتخسر، ويكتب لك كم أكلة جاب الخصم.

النقاط: إذا فريق الطالب جاب طلبه ياخذ نقاط الطلب (طلب ٥ = ٥ نقاط، ٦ = ٦، وهكذا للباون ٩) والخصم ما ياخذ شي.

وإذا فشل، الخصم ياخذ الدبل (طلب ٥ وخسر = ١٠ نقاط للخصم) والفريق الطالب ما ياخذ شي.

الفوز: فريق يوصل ٥١ والخصم لسا صفر، أو إذا الخصم مو صفر لازم واحد من الفريقين يوصل ١٠١.

إذا لاعب طلع من الصفحة أو انقطع، يلعب مكانه بوت لين يرجع.